Dr Sami u dr Chrigu. Satire.

Dr Sami u dr Chrigu.

I ha e Fründ, dr Chrigu. Aer isch wi ig o e Ämmitauer.Nid grad so e schnäue wi ig, aber lö mir das! Dä Chrigu hett o e Frou u no ganz e nätti. Wi är das gschaffet hett, di z'übercho, weiss ig o nid. Aber lö mir das. Item, ds Käthi, so heisst di, hett mi mau bi eme Träffe näbeume gno u hett e chly verläge gfragt, was ächt mit ihrem Chrigu passiert sig, dä heig doch süch im Huushaut nie e Finger grührt. Im Gägetiu, we sine gfragt heigg für öppis z'häufe, heig är numme di Dummi gha, ob ig verrucht sig, är sig doch kes Weichei u mach da sicher das Huusmannsgschtürm vo de Emanze nid mit. Für das heig mi schliesslich emänd d'Wyber u für so öppis heigg me se ja o ghürate. Ömu nid für das di dr ganz Tag chönn umplaschte u dr Maa sött de nach em Fürabe no d'Huushautig mache. Nei, mit ihm, em Chrigu, mach me das nid. So hett är chäret u fasch nümme wöue höre giftele. U itz uf ds'mau sig dä ganz angersch: Ständig frag är, ob är no öppis chönn häufe, ob i ächt nid chly wöu ga lige u mi chly schone. Sogar probiert z'choche heig är. Klar hanu müesse ygriffe, wo ner Teigware i Bratpfanne hett ta u das ohni Wasser u di ir Chuchi umegfloge si. Aber är hett wenigschtens wöue. Aber i ha itz Angscht, mym Chigu heigs ziemlich i Weize ghaglet. Irgendwie louf bi däm es Redli verchehrt, gloube i. Ds Käthi hett mi du bäte, i sou doch bi Glägheit ihrem Maa chly ufe Zahn fühle, was das söu si. Das hani du bim nächschte Birli, wo mir zäme trunke hei, o gmacht. "Du Chrigu", hani gseit: "Dis Käthi tuet di schön rühme, wi du ufzmau ganz e angere sigsch u ihre ir Huushautig häufsch, was numme chönnsch ... Hesch uf z'mau so Früüd übercho a dr Arbeit? Du hesch doch süsch ender gföplet über di Pingle, wo sich da vo ihrne Froe löie la umekommandiere." Dr Chrigu hett afa umemurgse u hett uf ds'mau schnäu ds Birli ustrunke u wöue ga. Aber i ha nid lugg gla. "Ja, hesch du dä Artiku i üsem Libblatt nid gläse, Sämu?" "Was fürne Artiku?", hani erstuunt nachgfragt. "Mehr Sex dank Hausarbeit" sig i dr Überschrift gschtange u wyter heigs gheisse, di Schtudie, wo amerikanischi Forscher erforscht heigi, zeigi, dass Manne, wo viu i dr Huushaltig häufe, es bessersch Sexualläbe heigi. Settigi Paar heige o me Sex, steit o." Dr Chrigu hett chly verläge a sym Birli gsüglet u du führe brösmelet: "U wiu das Letschte vo mir Syte mänggisch chly meh dörfti si, hett mir das imponiert, obschon, chaisch dr vorsteue, mir das nis liecht gfaue isch. Aber was machsch nid aus, für wider chly Schwung i ds Bett z'bringe." Mi hetts innerlich fasch verputzt vor lache u glich hett mi dä Chrigu fasch duuret, dass är sich vome settige Seich hett la i ds'Bockshorn jage. "U de, nützts wenigschtens?", hani gfragt. "Das chunnt de scho. Käthi muess sich itz zersch vo däm Schock erhole, wo mi Verhautensänderig usglöst hett." I ha ds Lache muesse verbisse u gseit, ja das chönn i mir vorsteue. Übrigens i ha du nache gluegt: So ne Artiku isch tatsächlich uf letschte Syte vo dr abonnierte, ehrwürdige Zytig, mit eme bekannte Name, gschtange u isch ke Apriuscherz.

Dr Sami u dr Chrigu 2

I ha im Löie ir Gaschtstube es Birli trunke u chly mit dr hübsche Särviertochter gflörtet. Wius am früchere Aabe isch gsi, hetts no nid viu Lüt gha u drum hett d'Särviertochter o chly Zyt gha. Uf ds mau geit Türe uf u mi Fründ dr Chrigu steit in dr Türe. Är seit nid, wi süsch aube u wi es e rächte Ämmitauer o seit "Sälu zäme" oder "Grüessech mitenang", nei, är pägget dür di ganzi Gaschtstube düre "I salute you", derzue grinset är über ds ganze Gsicht. Natürlich seit är das Änglisch so, dass es wahrschinlich e Ängländer nid würd vestah, nämlich mit eme Dütschäkzent, wi nes schöner nid chönnti si. Di wenige Lüt, wo idr Gaschtstube si gsi, hei glueggt, wi we es Gschpänscht vore stingi, derzue hei si natürlich grinset u sich sicher gfragt, was ds Manndli da i syne Überchlyder ächt wöu u was dä da für ne Schprach redi. Das das Äglisch söu si, isch wahrschinlich niemere i Sinn cho. Drum hett o nimmer dä Gruss erwideret. O i nid ds Säviertochter, wo ja dr Chrigu gut kennt hett - si isch sogar mit ihm verwandt gsi -  hett unglöbig luegt. Wo mi dr Chrigu a üsem Schtammtisch gse hett, isch är Schnurstracks uf mi los gschtüret. "Hello my Friend, Semel" hett zu mir gseit. U zur Särviertochter "Hello my Darling, Margreit". Mi muess wüsse, das Särviertochter "Margrit" heisst. O di Wörter hett dr Chrigu so komisch gseit, dass mir beidi hei müesse lut use lache. "Heh, heh Chrigu, was söu das, was isch dr da über d'Läbere graget, dass du da wosch Änglisch rede, das söus doch si oder? Nei, nei, säg mir nid öppe du wöusch chinesisch rede?" hani zuenim gseit, woner abghocket isch. Äer hett mi komisch gmuschteret u nä vo obe ache gseit: "Heschs no nid gmerkt, Sämu? Änglisch muess me hüt chönne. Süesch isch me sogar aus Bauarbeiter wi ig nümme In. Miner junge Kollege verstani fasch nümme, so schlö di mit settigne Usdrück umenang. Ds Käthi hetts o gseit, i sig nümme In, wo ig di Usdrück am PC nid verstange ha u hett mi usglachet. Drum hetts üs grad sofort zume Kurs angmäudet u drum muess ig itz üebe". "Was du geisch e PC? Dä arm PC!" hani glachet. "Aber itz hör uf mit däm Blödsinn u red wider, wi dir dr Schnabu gwachse isch, nämlich uses schöne Ammitaujänerbärndütsch. I wott mi a dir nid ono ergere. Das tueni i süsch gnu, weni gseh, wiu di längerschi meh, sich änglischi Wörter langsam aber sicher i üsi Schprach yschliche. We di Junge, aber o sogar Euteri e Verein gründe, de chame däm zum Byspiu nüme säge "Fliegen mit Yoga", nei mit seit "Flying Yoga" oder "Schuhen mit sehr hohen Absätzen" seit me "High Heels". I bi sicher es geit nid lang, heisst nümme "Jodlerklub" wi bis itz, nei das heisst de "Club for jodeling". Weisch Chrigu, Änglisch isch hüt wichtig u mi muess sich witerbiude. Aber das heisst nid, dass me wäge däm üses schöne Bärndütsch söu verhunze. Auso Chrigu, red wider, wies em beschte chaisch, nämli üses Ämmitaujänisch." I ha mis Bierglas glüpft u "Proscht" gseit. "Probier itz nid öppe, mir uf Änglisch zuproschte, süsch!" I ha spasseshauber mit Arm uchegha. Dr Chrigu hett doch du o müesse grinse un hett ds Glas mir egäge gha u gseit "Hesch ja rächt Sämu. Auso eifach "Proscht".     

.